ENSHEIM Homepage


2.6 Das politisch-kulturelle Leben in Ensheim im Überblick


2.6.5 Das Brauchtum in Ensheim


Geißebaal in Ensemm

[E Geschichd uss Ensemm vumm Scholl Sepp uss Dingmadd uff Dingmadda Pladd]

Es war in derer Zeijt, wo das bayerische Ensemm noch bei Dengmert war. Heijt geheert’s jo zum preißische Sabrigge.

An’me Samschdamorje läs ich in de Zeidung: „Am heutigen Samstag 20 Uhr, findet im Saale P. B. in Ensheim der traditionelle Geißeball statt!“

Geißebaal in Ensemm! – Du muschde hin, han ich mer gesahd; du haschd in deim Läwe schun soviel Bääler mitgemach, awwer uff’m Geißebaal warschde noch nedd gewähn. Daß muß ebbes ganz Originelles sin, so e Geißebolonäs! – So ebbes esch jo nure off’m Land mechlich, inn’re Schdadt kennt mer so ebbes nedd mache.

„Lisa“, han ich zu meiner Fraa gesahd, „heijd owedd geht’s noh Ensemm!“ – „Noh Ensemm? Was maschd dann du in de Naacht noch in Insemm?“ hadd Meins gemennd. „Do läs, Aldi“, on hanner die Zeidung gebb. „In Ensemm esch heid owedd Geißebaal, do muß ich hin.“

Geje sechs Uhr owedds hann ich mei Sonndaasmondur ohngezoh on mich fertig gemach. Bei meim Nochber war ich serschd noch e Bindelche Heij lehne. Met leere Hänn wollt ich jo nedd grad off de Geißebaal komme. Vielleicht muß mer de Endridd mit’me Bindelche Heij bezahle. Desweje, Vorsicht!

Wie ich so geje acht Uhr mit meinem Bindelche Heij unnerm Aarem noh Ensemm komme, war off de Schdrooß weijd brääd kän Minsch se siehn, viel wenicher noch e Geiß. So sin ich e guhder Schdorme off de Schdrooß off onn abgang for jemande se dreffe, der mer sohn kann, in wellem Saal die geiße ihr Baal abhalle.

Meh wie zeh Minudde sin ich hin und hergelaaf, off äämol heer ich e Geiß meggere. Ich dabber in die Richdung wo das Gemeggers herkummt, und siehn in’me Gäßje e Fraa mit’r Geiß schtehn. Die Fraa zerrt an de Geißekett on ruft: „Komm, Biedsch, komm!“ Die Biedsch awwer schteht do wie em Schmelzer sei Dampwalz on war nedd vom Blatz se brenge.

Ich sin zu der Fraa hin on fro’se ganz heeflich, ob se aa off de Geißebaal geht, doch guggd die mich dumm ohn on frohd, ob ich se noch all hädd? – „Helfe se mer liewer die Geiß dowägg se bringe on schwätze se nedd so domm“.

Ich wollt der Fraa jo helfe, doch wie ich in die Näh’ von der Geiß komme, riechd die es Hei unner meim Aarem on schprengd met äänem Satz off mich zu. Die Geißefraa mennd, ich soll’s Heij in die Hand hole on vor de Geiß hergehn, die dähnd nocher noolaafe.

So hann ich’s a gemach, on die Geiß aa. Mei Meenung, die Fraa dähd a off de Geißebaal gehen, war nedd richdich. In de Näh’ vom Loggal sahd die Fraa „Danke scheen“ on geht met ihrer Geiß in e ganz anner Richdung.

Do hann ich geschdann mit’m Reschd vum Heij, wo mer die Geiß geloßt hadd. Drin im Saal hadd die Musigg grad geschpielt: "Mei Hut, der hadd drei Egge...“

Die hadd mei Hut awwer noch nedd gehadd; er hadd se erschd griehd, wie ich met meim Bindelche Heij unnerm Aarem in die Wertschaft eninnkum sin. Drinn hadd mich e Einheimischer gefrohd, wohin ich met dem Heij wolld? – Kaum hann ich gesaad, ich wolld off de Geißebaal, do sin ich die Wertschaft enaus off’s Plaschder geflo’.

Auße’m Saal heer ich grad noch die ledschde Taggde: „... drei Egge hadd mei Hut!“ – und die hadd’r jetzt werklich gehadd.

Anmerkung [PG]: Bei dem Lokal handelt es sich um das Gasthaus Paul Berg, kurz "Bärche".


Quelle: Josef Scholl: Ernstes und Heiteres aus dem alten St. Ingbert. St. Ingbert 1984, S. 97 - 99


Zurück zum Anfang des Dokuments

Zur Brauchtumsseite

Zurück zum Inhaltsverzeichnis

Zur Mindmap

Zum nächsten Kapitel: "Die Anfänge des Vereinswesens in Ensheim"



eMail an den Webmaster

© Paul Glass 1997 - 2003 ff

Last update: 15.10.2003